I vunë tritol në banesë, kush është efektivja e policisë që theu tabunë në Durrës

Deri më tani 10 persona janë shoqëruar në komisariat nga Policia e Durrësitpër t’u marrë në pyetje, për shpërthimin me tritol që iu bë gjatë mbrëmjes së djeshme efektives së policisë në Durrës, Ornela Buraku.

Ndërsa, pas dëshmisë së Burakut e cila ka thënë se nuk ka konflikte familjare dhe as personale me askënd. Por nga ana tjetër policia hedh dyshime se tritolu iu vu për shkak të detyrës. Ndërkohë, efektivja është në krye të detyrës pre 16 vitesh.

Kujtojmë që shpërthimi ka ndodhur në zonën e ish-Kënetës, aty ku ndodhet banesa e efektives Buraku. Ndërsa eksplozivi është vendosur në ambientet e jashtme të banesës por fatmirësisht nuk ka mundur të depërtojë Brenda. Si pasojë ka vetëm dëme materiale dhe është dëmtuar makina tip ‘Audi’ që është në pronësi të Burakut.

Jo të gjithë e dinë por Ornela Buraku është efektivja e parë femër në Durrës e cila mori detyrën për të garantuar rendin e sigurinë për qytetarët e vendit në vitin 2004. Efektivja më herët ka deklaruar se në fillimet e saj në këtë profesion ka qenë e paragjykuar por nuk hoqi dorë nga ky profesion i vështirë, shkruan Newsbomb.

Kur filloi të ushtronte detyrën shihej çuditshëm në rrugë. Edhe pse po komentohej shumë zgjedhja që bëri, ajo nuk hoqi dorë nga pasioni për këtë profesion dhe ëndrra për ta vazhduar më tej.

Pas 16 vitesh në këtë profesion banesës së saj i vihet eksploziv. Hetimet vijojnë por ende nuk ka asnjë autor të identifikuar. Pista kryesore e hetimit për këtë ngjarje sipas autoriteteve lidhet me ushtrimin e detyrës.