Dhe Emiljano Shullazi kërkon lirinë? Zbulohet kërkesa për Gjykatën e Posaçme të Apelit

Emiljano Shullazi, së bashku me anëtarët e tjerë të grupit të tij kanë drejtuar një kërkesë për Gjykatën e Posaçme të Apelit, në lidhje me ndryshimin e masës së sigurisë.

Prej më shumë se një viti, gjyqi është zvarritur nga njëra seancë në tjetrën, ndërkohë që ajo e rradhës do të mbahet sot në orën 12.00.

Ndërsa ditën e djeshme seanca e tyre është shtyrë për herë të tretë në Gjykatën e Apelit për Krime të Rënda.

Në nëntor të vitit 2018 Gjykata e Krimeve të Rënda shpalli fajtorë për përvetësim pasurie, kërcënim, e grup të strukturuar kriminal Emiljano Shullazin, i cili u dënua me 14 vjet burg.

Bashkëpunëtori i tij Gilmando Dani u dënua 12 vjet burg, Endrit Qyqja dhe Endrit Zela me nga 10 vjet dhe Blerim Shullazi me 9 vjet burg.

Kujtojmë se kjo kërkese vjen pas një numër vendimesh të marra për lirimin e disa të dënuarve me burgim të përjetshëm, ku duket se dhe Emiljano Shullazi pretendon të njëjtat përfitime.

Në ditët e para të këtij viti, u publikuan lirimi nga burgu i dy anëtarëve të bandës së Durrësit Endrit Dokle dhe Sardian Sulejmani, si dhe Ergys Kolaveri, nga ana e Gjykatës së Apelit në Tiranë.