Kryetari i Partisë Demokratike Lulzim Basha, ka përgëzuar sot vendimin e Këshillit të Europës për të dërguar në Komisionin e Venezias, paketën anti-shpifje.
Ai e ka komentuar këtë akt me anë të një mesazhi në rrjetet sociale, duke u shprehur se kjo gjë provon se dy projektligjet e kësaj paketë cënojnë drejtpërsëdrejti të drejtën e fjalës dhe informimit, dhe si rrjedhim dëmtojnë lirinë e mediavë në vendin tonë.
Basha ka hedhur edhe akuza në drejtim të kryeministrit Edi Rama duke u shprehur se indiferenca dhe kokëfortësia e pushtetit aktual provon se atij nuk i intereson integrimi europian i vendit por vetëm mbijetesa e tij politike me çdo kusht, përfshirë këtu përpjekjen për t’ua mbyllur gojën mediave.
REAGIMI I PLOTE I KRYETARIT TE PD LULZIM BASHA
Përshëndes vendimin e marrë nga Komiteti i Monitorimit të Asamblesë Parlamentare të Këshillit të Europës për ta çuar paketën e ashtuquajtur “anti-shpifje” në Komisionin e Venecias. Ky akt provon se dy projekligjet e kësaj pakete cënojnë drejtpërdrejtë të drejtën e fjalës dhe drejtën e informimit duke dëmtuar rëndë lirinë e mediave në Shqipëri.
Nga ana tjetër është e turpshme dhe e ulët që Komisioni i Veprimtarisë Prodhuese i parlamentit kukull nën urdhrat e Ramës, ka rrëzuar dekretin e Presidentit pa reflektuar jo vetëm mbi verejtjet e tij, por edhe ato të komunitetit shqiptar të mediave dhe organizatave të ndryshme ndërkombëtare.
Pushteti aktual qendroi i shurdhër edhe ndaj qëndrimeve të Komisionit Europian që tregonin se mosreflektimi për këtë paketë dëmton procesin e integrimit europian. Kjo indiferencë e kokëfortësi demonstron se Ramës nuk i intereson integrimi europian i vendit por vetëm mbijetesa e tij politike me çdo kusht, përfshirë këtu përpjekjen për t’ua mbyllur gojën mediave. #MOSnaPREKfjalën
