LIGJET E BIZNESIT
Një nga çështjet më të debatuara e më të ‘nxehta’ midis Shqipërisë dhe Greqisë është ajo e kufirit detar, e cila mbetet ende e pazgjidhur.
Së fundmi, ish-ministrja e jashtme greke Dora Bakojani, ka kërkuar nga qeveria e saj që të ndërmarrë veprime konkrete për mbylljen e kësaj çështjeje.
Ajo ka deklaruar se Greqia duhet t’i dërgojë Shqipërisë një mesazh të qartë dhe se Athina duhet të zgjerojë kufirin e saj detar me 12 milje.
“Greqia duhet të shfrytëzojë mundësitë që ofrohen aktualisht me Shqipërinë, Italinë dhe Egjiptin, dhe të përpiqet të përfundojë marrëveshjet e demarkacionit detar. Vendimi i Francës për të bllokuar perspektivën e pranimit evropian të Shqipërisë dhe Maqedonisë për momentin i jep Greqisë pozicionin që i duhet për të luajtur një rol në Ballkan.
Ne mund të formojmë një kornizë më të mirë dhe të negociojmë marrëveshje të dobishme me fqinjët tanë. Objektivi kryesor gjithmonë duhet të jetë lidhja e marrëveshjeje. Por sigurisht kjo nuk është një doktrinë. Pas zhvillimeve të vitit 2009, tërheqjes së Tiranës dhe anulimit të marrëveshjes shembullore të zonës detare, Greqia mund të ushtrojë të drejtën e saj për të zgjatur zonën e saj bregdetare në 12 mijë milje të tjera.
Shqipëria u tërhoq nga marrëveshja pa asnjë kosto për veten e saj, sepse, për mendimin tim, në atë kohë në politikën e jashtme greke kishte dobësi. Shqipëria duhet të kuptojë se, përveç të drejtave të padiskutueshme të pakicës greke në Shqipëri, është në interesin e saj që të mbajë premtimet nëse me të vërtetë dëshiron ta ketë Greqinë si aleate në luftën e saj për integrimin evropian.
Duhet të bëhen veprime konkrete, 12 milje me Shqipërinë, 12 milje tani. Koha nuk është në avantazhin tonë,” u shpreh Bakojanis.
