Basha i përgjigjet ftesës së Ramës për bashkëpunim: Po të isha në qeveri, s’do kërkoja foto të përbashkët

Kryetari i Partisë Demokratike, Lulzim Basha vijon të refuzojë bashkëpunimin me kryeministrin Edi Rama. Ky i fundit, pas ditëve të vështira që po kalon vendi për shkak të tërmetit, i bëri ftesë kreut të opozitës që të ulen e të zgjidhin problemet bashkë.

Por Basha deri tani nuk ka dhënë sinjale bashkëpunimi. Edhe gjatë një takimi që zhvilloi para disa minutash me banorët e Durrësit, Lulzim Basha përsëriti qëndrimin e tij refuzues. Sipas tij, tani nuk është koha për të bërë fotografi të përbashkëta.

“E rëndësishme është që ne të sjellim zërin dhe shqetësimet tuaja. Ky është roli ynë. Nëse ne e marrim zërin tuaj dhe e kthejmë në politikë për karriken tonë, ne bëjmë gabim. Nëse ne çojmë shqetësimin tuaj atje, ne e kemi bërë detyrën tonë, sepse po nuk e bëmë ne, nuk ka kush ta bëjë.

Edhe po të ishim në role të ndryshme, ne në qeveri dhe ata në opozitë, këtë do kërkoja nga ata. Nuk do kërkoja të bëja fotografi bashkë. Do t’u kërkoja ‘merrni zërin e njerëzve na e sillni dhe shikoni si po e bëjmë ne punën” Se këtë detyrë ka opozita. Po u shkri opozita, nuk ka më kush t’ju mbrojë”, deklaroi Lulzim Basha.

Lideri demokrat kërkoi edhe një herë nga qeveria që vlerësimi i dëmeve të bëhet sa më parë.