Panairi i Librit çeli siparin në 13 nëntor dhe pritet të mbyllet ditën e nesërme. Këtë vit kanë qenë të shumtë autorët që kanë marrë pjesë me botimet e tyre. Ndërkohë pasditen e sotme janë ndarë edhe çmimet për shkrimtarët pjesëmarrës.
Autori më i mirë i vitit 2019 shpallet Besnik Mustafaj, me romanin “Dëmtuar gjatë rrugës”, me motivacionin: Për përshkrimin plot realizëm dhe ironi të hollë të një periudhe dramatike, ende të pranishme dhe të gjallë në mendjet e njerëzve; ravijëzimin plot ritëm poetik, estetik dhe të besueshëm të personazheve dhe rrëfimin transparent të zvetënimit të individit në një shoqëri totalitare.
Përkthyesi më i mirë i vitit 2019-të shpallet Korab Hoxha për përkthimin e vëllimit me poezi, ese dhe proza të shkurtra të shkrimtares ruse Marina Cvetajeva, “Tetori në vagon”.
Autori më i mirë i prozës memorialistike shpallet Lekë Tasi me librin e tij “Grabjani rrëzë kodrave”, me motivacionin: Për sensibilitetin dhe mesazhin e prozës së tij në përshkrimin plot vërtetësi tronditëse të ngjarjeve dhe njerëzve, përmes shquarjes së njerëzores nën terrin e diktaturës.
