I dogjën ‘Benz-in’ gjatë natës, flet gjyqtari Ymeri: Ta harrojnë se mund të më bëjnë presion, unë nuk tërhiqem

Gjyqtari Andri Ymeri, të cilit i dogjën makinën natën që kaloi, ka folur përpara gazetarëve për ngjarjen e rëndë.

“Gjyqtari duhet të jetë i përgatitur për çdo gjë. Nëse kam qenë unë objektivi, ta harrojnë se mund të më bëjnë presion për punën time. Nëse kam qenë unë objektivi për shkak të detyrës kam qenë. Gjyqtari duhet të jetë i përmbajtur dhe i rezervuar. Çfarë kam pasur për të thënë i kam thënë në institucion”, u shpreh Ymeri.

Kujtojmë se mbrëmë rreth orës 23:30 dy persona, identitetet e të cilëve ende nuk dihen, ishin të pajisur me skafandra në kokë dhe i kanë vënë flakën mjetit tip “Benz” në pronësi të gjyqtarit, mjet i cili ndodhej i parkuar në lagjen “Vasil Shanto” në Shkodër.

Për pasojë është djegur dhe një tjetër makinë ngjitur.

Më pas autorët u larguan por policia dhe grupi hetimor vijojnë punën për kapjen dhe identifikimin e tyre.

Ende nuk dihet as arsyeja se përse ka ndodhur ngjarja por dyshohet se ka ardhur për shkak të detyrës.