Një ditë pas ngjarjes së rëndë, ku një punëtor në Golem të Durrësit humbi jetën pasi ra nga lartësia, policia ka arrestuar përfaqësuesin e firmës së ndërtimit.
Gjithashtu mësohet se janë shpallur në kërkim administratori dhe drejtuesja teknike.
Nga hetimet paraprake, punëtori 40-vjeçar i cili ndërroi jetë në spital pasi ra nga lartësia, rezulton se ishte i pasiguruar dhe nuk kishte kontratë pune me firmën e ndërtimit.
I arrestuari është me iniciale M. K., 37 vjeç, banues në Durrës. “Ky shtetas, me detyrë përfaqësues i firmës që kishte marrë përsipër kryerjen e punimeve në objektin e ndërtimit në Golem ka shkelur rregullat e mbrojtes në punë, pasi nga verifikimet e kryera ka rezultuar se punëtori D. H. (i cili ra nga lartësia dhe më pas ndërroi jetë në spital) nuk ka qënë i siguruar dhe nuk ka patur kontratë pune me firmën e punimeve që shtetasi M. K. përfaqësonte.
Gjithashtu janë shpallur në kërkim policor administratori dhe drejtuesja teknike e firmës që kryente punimet, shtetasit I. K. dhe E. S., pasi nuk kishin marrë masa për zbatimin e rregullave të mbrojtjes në punë. Materialet procedurale iu referuan për veprime të mëtejshme Prokurorisë pranë Gjykatës së Shkallës së Parë Kavajë, për veprat penale “Shkelja e rregullave të mbrojtjes në punë” dhe “Punësim i paligjshëm”, thuhet në njoftim.
