Elva Margariti është një nga emrat e rinj në kabinetin qeveritar Rama, por edhe në politikën shqiptare. E kthyer në Shqipëri vetëm 5 vite më parë, Margariti ishte një surprizë për shumëkënd që e patë të ngjitej në podin më të lartë të ministrisë së Kulturës. Por në një rrëfim për emisionin “Ftesë në 5”, Margariti ka treguar se edhe për të vetë vendosja në këtë pozicion ka qenë një surprizë shumë e madhe. Pas ngurrimit në momentet e para, Margariti ka treguar se tashmë e ka marrë pozicionin e ministres si një sfidë personale.
“Nuk ishte aspak në projeksionet e mia. Ishte një surprizë. Me të vërtetë, siç jam unë një person me këmbë në tokë, mu duk një gjë tej mase e madhe në fillim. Pastaj, fillova ta shikoja si një sfidë. Unë çdo hap që kam ndërmarrë e kam parë si një sfidë me veten time. Kur e shikon që dikush shikon tek ti një pozicion më të lartë se sa ti shikon tek vetja, ok thua nëse të tjerët e kanë këtë besim tek unë, unë do ta arrij edhe këtë. Asnjëherë nuk e di se çfarë dyersh do të të hapen përpara dhe asnjëherë nuk do të dalësh pa përfituar diçka, një rritje minimalisht të vetvetes.”
Më tej në intervistën e saj në Top Channel, Margariti ka treguar se motivi që e ka kthyer atë në Shqipëri, fillimisht ka qenë ardhja e Papës në vendin tonë, ku ajo u përfshi në një projekt.
“Pesë vite më parë jam kthyer. Ardhja e Papës solli një energji shumë të madhe në Shqipëri. Ardhja e Papës në 2014, solli një ndryshim, ndoshta ju brenda në Shqipëri nuk e perceptonit, por unë nga larg dëgjoja aktiviteteve. Ka pasur një gjallëri. Tirana dhe Shqipëria në përgjithësi ka gjallëri. Çfarë i mungon qyteteve të vjetra në Itali dhe vende të tjera evropiane. Unë jam afruar për një nga projektet e mëdha të ardhjes së Papës. Ishte një hap që më bëri të qëndroja këtu dhe të ecja gjithnjë e më tepër në Shqipërinë time.”
