Ministri i Jashtëm në detyrë, Gent Cakaj është 28 vjeç, por ka 14 vite në politikë. Këto janë shifrat që ai ka dhënë në emisionin Opinion, në një intervistë ku ka folur për jetën e tij.
“Angazhimet e para i kam në shkollën e mesme. Me fillimin e shkrimeve politike e më pas deri në moshën 18 vjeçare. Kam botuar në gazetat ditore në Kosovë. Nuk ndihem komod me ato shkrime se tani kam evoluar. Në moshën 15 vjeçare jam bërë pjesë me Vetëvendosjen. Nuk kanë qenë shumë çështje politike, por nga pasioni politik. Ne nuk kemi zgjedhur politikën por ajo na ka zgjedhur ne”, thotë ministri në detyrë, i lindur në Prishtinë.
Ai ka treguar dhe se si e ka përjetuar luftën e Kosovës.
“Familja u nda gjatë luftës dhe unë përfundova në Strugë. Babai im mbeti në Prishtinë dhe pjesa tjetër e familjes ka jetuar në Strugë. Më kujtohet në atë kohë shija e hidhur e jetës. Jeta në rutinë, paniku bëhet i zakonshëm. Lojërat ndërpreheshin, kur binte telefoni”.
Cakaj ka thënë se Shqipërinë e ka vizituar për herë të parë pak vite pas luftës.
