Në pranga 6 policë të portit të Durrësit. Ja arsyeja

Ditën e sotme 6 policë, të portit të Durrësit janë vënë në pranga. Ata janë akuzuar për korrupsion dhe shpërdorim detyre.

Ndalimi I tyre është bërë nga Shërbimi për Çështjet e Brendshme dhe Ankesat, pas një hetimi disamujor. Arrestimet janë bërë në sheshin e trageteve.

Të arrestuarit janë:
A. Gj., 53 vjeç, me detyrë Kontrollor në PKK Porti Durrës
G. B., 29 vjeç, me detyrë Kontrollore në PKK Porti Durrës
G. Ç., 51 vjeç, me detyrë Ndihmës Kontrollor në PKK Porti Durrës
D. D., 53 vjeç, me detyrë Kontrollore në PKK Porti Durrës
D. Z., 50 vjeç, me detyrë Kontrollor në PKK Porti Durrës
J. K., 42 vjeçe, me detyrë Kontrollore në PKK Porti Durrës

“Procedimi penal ndaj tyre kishte nisur që në vitin 2018, ku SHÇBA ka mundur të provojë përmes hetimit që këta persona, në këmbim të vlerave të ndryshme monetare, bënin të mundur kalimin e paligjshëm të personave me probleme, apo kategorisë së shtetasve që nuk u lejohet udhëtimi drejt zonës “Shengen”.

Gjatë kontrollit të ushtruar në kushtet e flagrancës, punonjësve të policisë iu sekuestruan në cilësinë e provës materiale sasi vlerash monetare në lekë dhe euro, në vlerën 2 175 euro, që dyshohet se janë përfituar në mënyrë të kundërligjshme dhe korruptive gjatë ushtrimit të detyrës”, thuhej në njoftimin e policisë.