Një aksident i rëndë ka ndodhur në këto çaste tek kryqëzimi i 21 Dhjetorit në kryeqytet. Një autobus është përplasur me një autoveturë me ngjyrë vishnje, e tipit Citroen C3, që drejtohej nga një vajzë e re dhe brenda në mjet ndodheshin edhe dy vajza të tjera.
Sipas të dhënave paraprake nga vendngjarja mendohet se ka qenë makina Citroen që i ka prerë rrugën autobusit të mbushur me pasagjerë. Për të devijuar përplasjen, drejtuesi i autobusit është shmangur, duke dalë nga korsia e tij dhe duke prishur trafikndarësen.
Nga pasagjerët e autobusit nuk ka pasur të lënduar, por vetëm dëme materiale. Ndërkohë që sipas të dhënave paraprake, mësohet se një nga vajzat që ndodhej në autoveturë është në gjendje të rëndë dhe dy të tjerat janë plagosur.
Në vendngjarje ka mbërritur policia, e cila ka rrethuar vendin dhe ka devijuar trafikun. Paralelisht ka nisur hetimi për ngjarjen. Kanë mbërritur gjithashtu, edhe ambulancat që kanë bërë transportin e vajzave të plagosura për në spital.
