Kryetarja e Lëvizjes Socialiste për Integrim, Monika Kryemadhi ka akuzuar kryeministrin Edi Rama si i përfshirë në “Dosjen 339” në vjedhjen e votave. Ajo deklaroi nga Gramshi, ku zhvilloi një takim se LSI nuk do të ndalet në asnjë moment duke denoncuar blerjen e votave me paratë e drogës.
“Janë mbi 300 denoncime të LSI-së në zyrat e OSBE-së, ku denoncojnë jo vetëm blerjen e votës, por dhe përdorimin e bandave kriminale edhe të segmenteve kriminale, së bashku me Policinë e Shtetit në favor të votës për PS-në. Nuk u ndalëm në asnjë moment dhe nuk kemi për tu ndalur për ta denoncuar.
Sot në zyrat e Prokurorisë qëndron “Dosja 339”, për përfshirjen e eksponentëve të lartë të PS-së, që nga Vangjush Dako dhe pse jo edhe Edi Rama, ku blihen votat me grupet kriminale.
Dosja 184, ku ka ministra e deputetë të PS-së të përfshirë në blerjen e votave, por dhe në këmbim të blerjes së votave përkundrejt lejimit të parcelave të hashashit në Bashkinë e Dibrës”, u shpreh Kryemadhi.
Sipas kryetares së LSI-së, kriminalizimi i zgjedhjeve në Shqipëri ka shkuar në çdo qelizë dhe e vetmja mundësi për të risjellë stabilitetin do të ishte shkrirja e një Parlamenti, ku deputetët janë zgjedhur me vota të blera dhe të deformuara, nëpërmjet parave të krimit dhe bandave kriminale.
