Vendimi për djegien e mandateve i ka befasuar të gjithë, madje ka gjetur të papërgatitur edhe mazhorancën. Duke marrë shkasë nga ngjarjet e fundit ditën e sotme, ambasadorja e Gjermanisë në Tiranë, Susane Schutz, ka nisur një takim me kryetaren e LSI-së, Monika Kryemadhin.
Takimi me Kryemadhin ka ardhur fill pas takimit me kreun e PD, Lulzim Bashën.
Takimi po zhvillohet në selinë e LSI-së, në kuadër të vendimit për djegien e mandateve nga opozita. Kujtojmë se opozita vendosi unanimisht të djegë mandatet parlamentare, ndërsa këtij vendimi iu bashkuan edhe aleatët duke përfshirë edhe LSI.
Sot në orën 17:00, PD ka thirrur Këshillin Kombëtar, i cili do të jetë organi përfundimtar që do të vendosë për lënien ose jo të mandateve.
Më hërët në takimin me kreun e PD-së, Lulzim Basha, ku ishte i pranishëm edhe ambasadori i BE në Tiranë Luigi Soreca, ky i fundit bëri thirrje për një protestë paqësore.
“Fola me të dyja palët dhe u thashë kushtin që ka qartësuar BE. Fola me Bashën dhe theksova rëndësinë e dialogut. Mendoj se nesër është një ditë e rëndësishme ne presim të mos ketë akte dhune dhe të ndiqen proceset demokratike”- është shprehur Luigi Soreca.
