I plagosur më 21 janar, gazetari Fatos Mahmutaj ka treguar shenjën që i la plumbi në dorë.
Ndërsa, gjatë një lidhje me Skype, në emisionin “Shqipëria Live”, Mahmutaj tregon se për shkak të plumbit që e ka marrë në dorë, gishti tregues nuk e kryen funksionin e tij të plotë.
“Ja në gishtin tregues ka një shenjë të ngritur. Ja ku dallohet. Kjo është vrima hyrëse mes dy gishtave, Për shkak të kësaj, gishtin tregues se kam në përdorim 100%. Herë pas herë më bllokohet. Këtu më bënë ndërhyrje kirurgjikale dhe plastike,”-tha gazetari.
Sot plot 9 vite nga ngjarja e 21 Janari, kur Garda e Republikës, asokohe nën komandën e ish-komandantit Ndrea Prendi, hapi zjarr ndaj protestuesve të thirrur nga Partia Socialiste para Kryeministrisë, ku mbetën të vrarë 4 protestues: Aleks Nika, Ziver Veizi, Hekuran Deda dhe Faik Myrtaj.
Gjykata vlerësoi se vrasjet e Ziver Veizit, Faik Myrtajt dhe Hekuran Dedajt kanë ndodhur nga pakujdesia dhe dënoi ish-komandantin e Gardës, Ndrea Prendi me një vit burg, si dhe gardistin Agim Llupo me 3 vite.
