Artisti i njohur dhe mjaft i dashur për publikun shqiptar, Flori Mumajesi dëshmoi dje se përtej çdo ndjesie emocionale apo artistike, ai është njerëzor.
Në faqen e tij në Instagram, ish-bashkëpunëtori legjendar i Elvana Gjatës dhe një ndër bashkëpunëtorët aktual të Arilenës, nuk postoi asgjë. Do të ishte shumë e natyrshme që Flori t’i bënte një urim fitueses së “Festivalit të Këngës”, me të cilën sapo realizoi një duet të kompozuar nga Darko Dimitrov.
Por në një natë “të nxehtë”, kur publiku ishte ndarë në gjysmë mes Arilenës dhe ish-bashkëpunëtores më të vyer të Florit, Elvana Gjata, që për hir të së vërtetës kanë krijuar disa nga këngët më të bukura të muzikës shqiptare, ai vendosi të heshte.
Nëse ju kujtohet, menjëherë pas shkëputjes së bujshme të Elvanës nga Flori, me të cilin kishte bashkëpunuar prej 10 vitesh, në lojë hyri Arilena. Bashkëpunimi i tyre i parë ishte “Nallane 3”, që ndiqte “Nallane 2”, një këngë e cila u përfol se ishte shkruar posaçërisht për Elvanën, pas shkëputjes së marrëdhënies.
Mediat aluduan se ardhja e Arilenës ishte një përpjekje e Florit për të zëvendësuar Elvanën. Por Arilena, 19-vjeçare asokohe, deklaroi në Top Show se nuk ishte zëvendësim i askujt. “Çdo njeri ka vendin e tij,” tha ajo.
