Durrësi në zi, me lot në sy përcillen drejt banesës së fundit 8 anëtarët e familjes Lala

Durrësi përcjell sot  viktimat e tragjedisë së tërmetit katastrofik që tronditi vendin mëngjesin e së martës së 26 nëntorit. Njerëz me të zeza, makina të zeza për t’i bërë nderimet e fundit 8 anëtarëve të familjes Lala që nuk i mbajti dot toka dhe gjetën vdekjen nën rrënojat e banesës së tyre në zonën e Kënetës në Durrës. Tetë arkëmorte do të dalin sot para syve të të afërmve e qytetarëve të Durrësit për t’u përcjellë në banesën e fundit.

Gjyshja Sahadetja, djali Iliri, nusja Marjeta, mbesa Grisilda, fëmijët e Marjetës, Amelia, Emilio, Dionisa dhe Enisi do kalojnë sot për herë të fundit në qytetin që i priti dhe i mori përjetësisht

I vetmi i mbijetuar i kësaj familje është Ramë Lala, i cili është nisur për mjekim të specializuar në Itali.