Aksident në Berat/ Kamioni bie në kanal, pronarët e firmës fshehin ngjarjen

Një kamion që transportonte pllaka guri ka përfunduar në kanal në fshatin Bogovë të Beratit.

Aksidenti ka ndodhur mëngjesin e sotëm, por pronarët e firmave të gurit dekorativ nuk e kanë njoftuar policinë.

Ata e kanë mbajtur ngjarjen të fshehte qëllimisht, madje shoferin e plagosur e kanë transportuar personalisht në Spitalin Rajonal të Beratit.
Shoferi i kamionit, 35-vjeçari Fatjon Rama ka thënë në spital se kishte rënë nga muri i shtëpisë duke fshehur aksidentin me kamion.

Ngarkimi i kamionëve gjatë natës dhe qarkullimi i tyre në rrugë të vështira për të dalë në fshatin Bogovë është bërë shkak për aksidentin që ka ndodhur në orët e para të mëngjesit të sotëm. Për shkak të rrugës së shkatërruar, kamioni ka rrëshqitur nga një lartësi rreth 5 metër dhe ka përfunduar në kanalin në anë të rrugës në Bogovë.

Burimet zyrtare të Policisë Berat thonë se pronarët e firmave kanë prishur vendin ku kamioni u përmbys për të zhdukur gjurmët.