Ministrja e Shtetit për Marrëdhëniet me Parlamentin, Elisa Spiropali ka komentuar gjestin e ambasadorit të OSBE në Tiranë Bernard Borchardt, i cili i drejtoi gishtin e mesit protestuesve të Unazës së Re përpara godinës së Drejtorisë së Policisë.
E ftuar në programin “5 pyetje nga Babaramo” Spiropali ka akuzuar opozitën dhe kryetarin e Partisë Demokratike Lulzim Basha të cilët sipas saj kanë vënë në shenjëstër ambasadorin e OSBE.
Ajo shton se Borchardt u provokua në momentin që po kalonte rrugën.
“Ai ishte në rrugë me gruan e tij. Ai është vendosur në sulmin e paprecedent, të Lulzim Bashës dhe të tjerëve, i kanë shkruar te dera e shtëpisë dhe i kanë shkruar si hebrenjve. E kanë sulmuar dhe lincuar.
Ai ishte i provokuar ty, sikur ishte te shtëpia e tij. Ai ishte duke kaluar si qytetar i lirë në rrugët e Tiranës, asnjë nuk ka të drejtë të të cënojë. Nuk ka ndodhur ndonjëherë që ndonjë ambasador të lincohet publikisht. Ky ambasador ua di shumë mirë hiletë të gjithëve. Ky është turp i madh dhe të mos guxojnë më këta që të sulmojnë ambasadorë. Nuk janë këta arsyet e humbjes së tyre, por kjo logjikë”, u shpreh Spiropali.
