Ngjarja e rëndë në Shkodër ku 50 fëmijë përfunduan në spital për shkak të një helmimi në një Fast Food, ka bërë që Autoriteti Kombëtar i Ushqimit të zhvillojë kontrolle të rrepta të këtyre subjekteve në afërsi të shkollave, çerdheve dhe kopshteve.
Me një njoftim të bërë publik në faqen zyrtare, AKU-ja thotë se janë kryer gjithsej 272 kontrolle zyrtare, për periudhën 16 shtator-09 tetor 2019, ndërsa ka bllokuar një sasi e madhe mishi dhe shumë subjekte janë kapur në shkeje të rënda.
Masat administrative i referohen shkeljeve të parashikimeve ligjore që lidhen me: tregtimin e produkteve jashtë afateve të përdorimit, mungesën e sistemit të gjurmueshmërisë, mungesën e planit të vetëkontrollit, kushtet higjeno-sanitare të papërshtatshme, mungesën të librezave shëndetësore, mosrealizimin e detyrave të lëna, tregtimin në kushte të papërshtatshme etj.
Autoriteti Kombëtar i Ushqimit do të vijojë kontrollet e njëpasnjëshme në të gjithë vendin për të garantuar Sigurinë Ushqimore, duke shmangur çdo praktikë abuzimi në dëm të shëndetit të fëmijëve, duke siguruar kështu vijimin e një viti të mbarë shkollor.
