Marsida Qatja, 30-vjeçarja e konsideruar si “molla e sherrit” në ngjarjen e ndodhur ditën e djeshme në qytetin e Kavajës, është marrë sërish në pyetje nga Prokuroria.
Qatja është marrë në pyetje për tri çështje. Së pari, Marsida Qatja ka dhënë dëshmi kontradiktore, pasi në Prokurori ka pohuar se ka pasur lidhje intime me viktimën Dritan Haxholli, ndërsa për media nuk e pranoi një gjë të tillë.
Pra, ajo do të pyetet sërish nga Akuza lidhur me njohjen, që kishte me personat e përfshirë në ngjarjen e rëndë, pasi përveç viktimës, 30-vjeçarja dyshohet se ka gënjyer edhe për raportin që ka me policin. Ndonëse ajo thotë se e ka shok, në telefonat e sekuestruar nga policia janë zbuluar mesazhe, që bien ndesh me deklarimet e saj, pra tregojnë të kundërtën.
Gjithashtu, lidhur me dyshimet që në darkë të jetë përdorur kokainë Prokuroria do të rimarrë në pyetje edhe policin Bledar Toçi, si dhe dy personat e tjerë që ndodheshin në banesën e Qatjas, të cilët do të pyeten se ku e kanë marrë kokainë dhe ku e shpërndanin atë.
