Ekipi ynë kombëtar ka zhvilluar sot paradite stërvitjen e rradhës në ditën e dytë të përgatitjeve përpara ndeshjes me Turqinë.
Trajneri Edi Reja dhe stafi ka programuar një fazë me dy seanca në ditë, deri ditën e enjte kur ‘Kuqezinjë’ do të udhëtojnë për në Stamboll.
Aspekti fizik ishte fokusi i kësaj séance stërvitore, pasi sfida me Turqinë do të kërkojë shumë energji nga futbollistët.
Të gjithë u vunë në dispozicion të trajnerit Edi Reja, por kapiteni Hysaj nuk ishte i pranishëm.
Hysaj nuk do të jetë më i gatshëm për shkak të dëmtimit i cili do ta lërë jashtë fushave të lojës për një muaj.
Tekniku kuqezi ka surprizuar teksa ka vendosur që për momentin të mos thërrasë asnjë zëvendësues, duke vazhduar me 24 futbollistët e grumbulluar, teksa nuk është preferuar asnjë nga lista e pritjes.
Alternativa e mundshme për të zëvendësuar Hysajn, është mbrojtësi i Almerias, Ivan Balliu, i cili nuk është thirrur nga trajneri.
