“50-100 euro vota” Pandeli Majko e pranon hapur: Në Shqipëri zgjedhjet janë blerë për shtatë palë qejfe

Ministri i Diasporës Pandeli Majko e ka pranuar faktin që në Shqipëri ka patur shit-blerje votash përpara zgjedhjeve, edhe për 50 euro por për shkak të “përplasjes së egër” madje shuma ka shkuar edhe deri në 100 euro.

I ftuar në programin “Top Talk” ministri Majko ka përmendur edhe “të fortët” e Partisë Socialiste që dolën në përgjimet e gazetës gjermane “Bild”, duke theksuar se kjo sjellje ka ardhur si një kundër reagim.

I pyetur nga gazetari Denis Dyrnjaja  nëse mazhoranca mban përgjegjësi për atë që ndodhi në zgjedhjet e 2017 Majko është përgjigjur se në Shqipëri të gjithë e dinë që është shitur edhe blerë vota disa herë.

Deri tani kemi folur vetëm për opozitën, por vetë mazhoranca nuk ka asnjë përgjegjësi politike për atë se çfarë ka ndodhur në zgjedhjet e 2017-ës?

“Më fal, ti mendon se në Shqipëri nuk e dinë njerëzit që sa herë është shitur vota, sa herë është blerë vota e sa herë është vjedhur vota?! Ky nuk është relativizim. E kemi thënë që ka pasur raste në disa zona se mesatarja ka qenë 50 euro dhe si pasojë e përplasjes së egër, ka shkuar deri në 100 euro. Tani, ju thoni se si ndodhi që PS mori ca të fortë? Sepse ishin ca të fortë që na rrihnin komisionerët. Dhe si çdo aksion ka një kundëraksion. Zgjedhjet janë blerë për shtatë palë qejfe në Shqipëri. Turpi më i madh është që hajduti të bërtasë për vjedhje.”, ka deklaruar Majko.