Autostrada Tiranë-Durrës është përmbytur si pasojë e reshjeve të dendura të shiut gjatë mesnatës.
Për këtë arsye është bllokuar dhe qarkullimi i mjeteve, i cili lejohet në aksin tjetër, nga rruga e vjetër Maminas-Vorë.
Mësohet se moti i keq ka sjellë dhe rrëshqitje gurësh dhe në rrugën Milot-Burrel dhe qarkullimi i mjeteve bëhet vetëm në një krah të rrugës.
Qytetet që janë prekur më shumë nga shirat dhe moti i furishëm janë Tirana, Fushë Kruja, Lezha, Durrësi dhe Vlora.
Katet e para të pallateve dhe shumë nga lokalet e kryeqyteti janë përmbytur. Në shumë qytete të vendit ka pasur edhe mungesë të energjisë elektrike. Ende vijojnë shirat e dendur.
