Tërmeti bie LIVE gjatë mbledhjes së qeverisë, trembet ministri Lleshaj

Teksa qeveria po zhvillonte mbledhjen e jashtëzakonshme për tërmetet në mesnatë, një tërmet ra sërish, duke trembur ministrin e Brendshëm, Sandër Lleshaj, i cili ishte duke raportuar për masat policore ndaj pasojave të lëkundjeve sizmike.

“Po përpiqem të mos më dridhet zëri mua se godina po lëkundet”, u shpreh Lleshaj. Ministri bëri të ditur se aktualisht në terren janë 2200 forca policore.

“Edhe strukturat e Policisë  janë angazhuar që në momentin e parë të tërmetit. Të gjitha strukturat janë ngritur dhe kanë marrë situatën nën kontroll. Të gjitha prefekturat janë në gatishmëri dhe më aktive janë Durrësi dhe Tirana.

Aktualisht janë të angazhuar 2200 forca policie dhe ka pasur 1261 telefonata që kanë qenë  për situatën. Qytetarët kanë nevojë për asistencë . Të gjithë janë të gatshëm dhe përcjellin një mesazh solidariteti dhe po vijojmë evidentimin e dëmeve që janë shkaktuar”, u shpreh Lleshaj.