Pas Valdrin Pjetrit, Partia Demokratike i kërkon Prokurirsë që të nisë hetimet edhe për kryebashkiakun e Vorës, Agim Kajmakun.
Në një letër që mban firmën e Sekretarit të Përgjithshëm, Gazment Bardhit, shkruhet që Kajmaku është arrestuar/ndaluar në Greqi dhe më pas është dëbuar. PD-ja thekson se Agim Kajmaku nuk ka udhëtuar drejt Greqisë për 12 vite rresht, ndonëse aty ka jetuar për shumë kohë edhe pse me një emër tjetër.
“Në Formularin e Vetëdeklarimit shtetasi Agim Kajmaku alias Jorgo Toro ka deklarur se ka jetuar për 5 vite në Greqi. Nga verifikimi i të dhënave të sistemit TIMS rezulton se shtetasi Agim Kajmaku alias Jorgo Toro nga periudha 2004 – 2016 nuk ka udhëtuar në asnjë rast të vetëm në drejtim të Greqisë, çka përbën një indicie për saktësinë e të dhënave të bëra publike më parë.”- argumenton PD në kërkesën për verifikimin e figurës së Agim Kajmakut.
“Nisur nga interesi i lartë publik që paraqet kjo çështje, Partia Demokratike e Shqipërisë pret një verifikim dhe reagim institucional të shpejtë nga ana e Prokurorisë së Përgjithshme, me synimin që të arrihet qëllimin primar që ka ligji i dekriminalizimit. Konkretisht, qëllimi i ligjit është të garantojë besimin e publikut në funksionimin e organeve të zgjedhura shtetërore, nëpërmjet pengimit të zgjedhjes ose emërimit në to të personave, të cilët janë dënuar për kryerjen të krimeve.”- thuhet në kërkesën e firmosur nga Sekretari i Përgjithshëm i PD, Gazment Bardhi.
