Drejtoresha e Tatimeve flet për aksionin anti informalitet dhe për faturat elektronike

E ftuar në rubrikën ‘Opinion’ në News 24, Ibrahimaj theksoi se efekti i fushatës së qeverisë për formalizimin, ka bërë që numri i bizneseve të regjistruara të rritet.

Ibrahimaj tha se Ligji për fiskalizimin do të bëjë që faturat të jenë elektronike, shkruan balkanweb. Sipas saj faturat elektronike po implementohen në të gjithë europën dhe se administrata tatimore ndërkohë po trajnohet për fushatën e fiskalizimit, pasi kjo e fundit ndihmon në hapjen e tregut.

‘Plani operacional nuk ndalon vetëm këtu. Ne po monitorojmë subjektet e ndërtimit, karburantet, ku kemi evidentuar një sërë shkeljesh, që po inspektohen. Synimi është që plani operacional të jetë i shpërndarë gjatë gjithë vitit. Duket sikur jemi vetëm te turizmi, por është vetëm sezoni që e bën të ndihet në këtë moment si një plan i drejtuar vetëm te ky sektor. Drejtoritë e Kontrollit në të gjitha drejtoritë rajonale janë përqendruar te kontrolli i karburanteve dhe kjo do vazhdojë deri në fund të vitit.”

“Deri në mes të shtatorit do jetë i përqendruar te turizmi dhe më pas do vijojë aty ku ka më shumë informalitet. Karburantet dhe ndërtimi, disa janë biznese VIP-a, disa janë të mëdhenj, dhe aty janë humbjet më të mëdha’, tha drejtoresha e Tatimeve, Delina Ibrahimaj.