Rama gjatë fjalës në asamble: Ekonomia shqiptare ka arritur në 30 miliardë euro, nga më pak se 10 miliardë në 2013

Kryeministri Edi Rama ka deklaruar se ekonomia shqiptare ka arritur në rreth 30 miliardë euro, nga më pak se 10 miliardë euro që ishte në vitin 2013, kur Partia Socialiste erdhi në pushtet.

Gjatë fjalës në Asamblenë e PS-së, Rama e përdori këtë tregues për të argumentuar progresin ekonomik të vendit dhe mundësinë për të ndërmarrë politika të reja fiskale dhe sociale.

Sipas tij, rritja e ekonomisë dhe zgjerimi i bazës së të ardhurave kanë krijuar hapësira për masa që më parë nuk mund të realizoheshin, pa cenuar financimin e buxhetit, investimet publike dhe rritjen e pagave.

“Nuk rishpërndahet varfëria! Këtë ka bërë Shqipëria deri përpara shtatë-tetë vjetësh. Rishpërndahej varfëria gjithë kohës. Nuk rishpërndahet varfëria, rishpërndahet pasuria dhe pasuria duhet krijuar”, deklaroi Rama.

Kreu i qeverisë theksoi se për të vijuar rritjen ekonomike nevojiten më shumë investime dhe sipërmarrje, duke paralajmëruar se Shqipëria duhet të ruajë hapjen ndaj investitorëve të mëdhenj. Ai nënvizoi se zhvillimi ekonomik është kusht për të financuar më shumë politika rishpërndarëse dhe për të përmirësuar mirëqenien e qytetarëve.