PS mbledh Asamblenë, Rama përcakton drejtimin për zgjedhjet vendore

Partia Socialiste mbledh sot Asamblenë e saj, në një takim që do të zhvillohet në orën 10:00 në një resort turistik në Gjirin e Lalzit, larg kryeqytetit. Axhenda e plotë e mbledhjes nuk është bërë ende publike, ndërsa është konfirmuar se kryeministri Edi Rama do t’u drejtohet të pranishmëve me një fjalim.

Mbledhja zhvillohet në një moment me rëndësi për organizimin politik të socialistëve, teksa përgatitjet për zgjedhjet e ardhshme vendore pritet të jenë ndër çështjet kryesore të diskutimit.

Në qendër të vëmendjes është edhe mënyra se si Partia Socialiste do të përzgjedhë kandidatët për 46 bashkitë. Ndërkohë, në diskutimet për zgjedhjet vendore të 9 majit 2027, një nga pikëpyetjet kryesore mbetet formula që do të ndiqet për përcaktimin e kandidatëve socialistë për kryetarë bashkish. Kjo garë do të zhvillohet në bazë të hartës së re territoriale, e cila parashikon 46 bashki në vend.