3 miliardë lekë për spitalet në 2027, ja ku do të investohen fondet

Rreth 3 miliardë lekë parashikohen të investohen gjatë vitit 2027 për ndërtimin dhe rikonstruksionin e spitaleve në vend. Fondi përfshin punimet, projektimin dhe mbikëqyrjen e projekteve, ndërsa pajisjet mjekësore financohen përmes zërave të veçantë të buxhetit.

Investimi më i madh për vitin e ardhshëm është parashikuar për godinën multifunksionale të Spitalit Rajonal të Korçës, ku do të financohen rreth 419 milionë lekë. Vlera totale e projektit arrin në 1.4 miliardë lekë, me financim të shtrirë deri në vitin 2029.

Në listën e investimeve renditet edhe Spitali Universitar i Traumës, për rikonstruksionin e godinave të të cilit janë parashikuar 390 milionë lekë. Projekti financohet nga buxheti i Ministrisë së Mbrojtjes dhe ka një afat zbatimi deri në vitin 2032.

Ndërkohë, në Qendrën Spitalore Universitare “Nënë Tereza”, rreth 272 milionë lekë do të shkojnë për rikonstruksionin e godinës së djegie-plastikës. Për maternitetin e Shkodrës janë parashikuar 260 milionë lekë për punime.

Një tjetër projekt i rëndësishëm është ndërtimi i spitalit në Shënkoll të Lezhës, i cili do të shërbejë për personat ndaj të cilëve gjykata ka vendosur mjekim të detyruar. Investimi ka një vlerë totale prej rreth 1.2 miliardë lekësh, ndërsa për vitin 2027 janë parashikuar 250 milionë lekë, përmes buxhetit të Drejtorisë së Përgjithshme të Burgjeve.

Fonde të konsiderueshme janë parashikuar edhe për rikonstruksionin e godinave qendrore të spitaleve të Pogradecit dhe Lushnjës, përkatësisht 244 milionë dhe 233 milionë lekë. Lista e ndërhyrjeve përfshin gjithashtu spitalet e Matit, Dibrës dhe Gjirokastrës, urgjencën e Durrësit dhe maternitetin e Fierit. Investime janë parashikuar edhe për godinat e reja të Spitalit Psikiatrik të Elbasanit dhe ndërhyrje në Maternitetin Nr. 1 në Tiranë. Projektet financohen me burime të brendshme.

Megjithatë, jo të gjitha projektet e përfshira në planifikimin afatmesëm do të kenë fonde për ndërtim gjatë vitit 2027. Për Spitalin e Ri Rajonal të Tiranës, vitin e ardhshëm parashikohet financimi i projekt-idesë, ndërsa fondet për ndërtimin shfaqen nga viti 2029.

E njëjta skemë parashikohet edhe për godinën e re të Spitalit “Shefqet Ndroqi”, financimi i së cilës pritet të nisë në vitin 2028, si dhe për maternitetin e ri të Pogradecit, ku fondet për ndërtim janë planifikuar nga viti 2029.