LIGJET E BIZNESIT
Pacientët me sëmundje onkologjike pritet të përfitojnë për herë të parë ekzaminimin PET-CT pa pagesë në sistemin publik shëndetësor. Shërbimi do të ofrohet pranë Qendrës Spitalore Universitare “Nënë Tereza”, ndërsa në projektbuxhetin e vitit 2027 është parashikuar një fond prej 250 milionë lekësh, për rreth 2,500 pacientë.
Lajmi u bë i ditur nga ministrja e Shëndetësisë dhe Mirëqenies Sociale, Klodiana Spahiu, gjatë raportimit në Komisionin e Ekonomisë, ku prezantoi fondet e parashikuara për sektorin e shëndetësisë në vitin e ardhshëm.
Sipas ministres, ekzaminimi PET-CT është veçanërisht i rëndësishëm për pacientët onkologjikë, pasi ndihmon në përcaktimin e përhapjes së sëmundjes, vlerësimin e përgjigjes ndaj trajtimit dhe orientimin e vendimmarrjes klinike.
Projekti po zhvillohet në bashkëpunim me Agjencinë Ndërkombëtare të Energjisë Atomike dhe përfshin përgatitjen e infrastrukturës, garantimin e sigurisë radiologjike, kualifikimin e personelit dhe organizimin e shërbimit. Ekzaminimet do të ofrohen pa pagesë pasi të përmbushen të gjitha kushtet teknike, profesionale dhe të sigurisë.
Ndërkohë, një tjetër fokus i buxhetit të shëndetësisë për vitin 2027 është zgjerimi i aksesit në barna, veçanërisht për pacientët me sëmundje tumorale.
Fondi për rimbursimin e barnave parashikohet të arrijë në 14.5 miliardë lekë, nga 13.5 miliardë lekë që ishte në vitin 2026. Kjo përfaqëson një rritje prej 1 miliard lekësh, ose 7.4%, me fokus të veçantë te barnat onkologjike dhe trajtimet e reja.
Përveç investimeve në trajtimin e sëmundjeve tumorale, buxheti i vitit të ardhshëm parashikon edhe rritje të pagave në sektorin shëndetësor. Sipas ministres Spahiu, rreth 400 mjekë rojë të urgjencës do të përfitojnë dyfishim të pagës.
Masat e parashikuara synojnë zgjerimin e shërbimeve publike shëndetësore, përmirësimin e aksesit në trajtime dhe forcimin e kapaciteteve të sistemit shëndetësor.
