LIGJET E BIZNESIT
Një shpërthim i fuqishëm mund të lërë pas dëme që nuk duken me sy të lirë, por që rrezikojnë qëndrueshmërinë e një ndërtese. Pas tragjedisë në Elbasan, inxhinieri Azmer Dulevic paralajmëron për nevojën e një ekspertize të detajuar të pallatit, ndërsa apelon për kujdes edhe në përdorimin e bombolave të gazit.
Një ditë pas ngjarjes, godina paraqitet me mure të shembura, beton, tulla dhe xhama të thyer. Në zonë vijojnë të qëndrojnë forcat e policisë dhe zjarrfikësit. Përtej dëmeve të dukshme, shqetësimi kryesor lidhet me sigurinë e strukturës së godinës dhe mundësinë e shembjeve të tjera. Inxhinieri Azmer Dulevic tha për Fast News Economy, se shpërthimi dhe temperaturat e larta mund të kenë dëmtuar betonin dhe kolonat mbajtëse, edhe në rastet kur dëmtimet nuk janë të dukshme nga jashtë.
“Duhet të bëhet një kontroll teknik i cilësisë së betonit të kolonave, pasi shpërthimi ka qenë i madh dhe mund të ketë plasaritje të strukturës. Qytetarët nuk duhet të kthehen në banesa pa e parë mirë dhe pa marrë konfirmimin e institucioneve”, shprehet ai.
Sipas inxhinierit, dëmtimet mund të jenë edhe të brendshme, duke krijuar rrezik për shembje të mëtejshme të strukturës ose të soletave. Dulevic thekson se banorët nuk duhet të rikthehen në godinë pa përfunduar kontrolli teknik i detajuar dhe pa marrë konfirmimin nga Inspektorati i Ndërtimit se struktura është e sigurt. Në rast se ekspertiza konstaton dëmtime të rënda dhe pasiguri strukturore, inxhinieri nuk përjashton as mundësinë që të kërkohet shembja e pallatit.
“Pra, absolutisht asnjë qytetar nuk duhet të kthehet aty, pa marrë konfirmimin më parë nga ana e Inspektoriatit të Ndërtimit, pasi është bërë kontrolli teknik i detajuar për të dalë në përfundimin që po, është e sigurt për t’u rikthyer, në të kundërt absolutisht mund të kemi dhe rastin që mund të kërkohet dhe shembja e pallatit, që nëse është i pasigurt, nuk duhet të rrezikohet jeta e qytetarëve.” thekson Duleviç
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Si të shmangen shpërthimet nga bombolat e gazit?
Duke iu referuar rrezikut të rrjedhjeve të gazit, inxhinieri u bën thirrje qytetarëve të tregojnë kujdes të shtuar gjatë rimbushjes së bombolave. Inxhinieri rekomandon kontrollin e valvulave, zëvendësimin e gomave izoluese dhe verifikimin e mundësisë së rrjedhjeve përpara përdorimit.
“Qytetarët duhet të kenë kujdes kur rimbushin bombolat me gaz, të sigurohen që nuk kanë rrjedhje, të ndërrojnë gominat dhe të kontrollojnë valvulën. Nëse është e mundur, mirë është t’i shmangin këto, pasi shpeshherë janë të pasigurta dhe mund të shkaktojnë rrjedhje gazi, por edhe flakë”, apelon Dulevic. Ngjarja në Elbasan rikthen në vëmendje rrezikun që paraqesin bombolat e gazit në banesa, si dhe rëndësinë e kontrolleve teknike për godinat e dëmtuara nga shpërthimet dhe zjarret.
