LIGJET E BIZNESIT
Ministri i Infrastrukturës dhe Energjisë, Enea Karakaçi, ka inspektuar këtë të martë ecurinë e punimeve në aksin rrugor Kombinat-Ndroq-Plepa, ku ka bërë të ditur se ka përfunduar ndërtimi i lotit të parë, ndërsa vijimi i projektit do të shtrihet në kilometrat e tjerë të këtij segmenti.
Sipas ministrit, 5 kilometrat e parë të rrugës, që lidhin zonën e Kombinatit me Pezën, kanë përfunduar dhe janë marrë në dorëzim nga Autoriteti Rrugor Shqiptar. Ndërkohë, kontrata për ndërtimin e 9 kilometrave të tjerë është finalizuar, duke hapur rrugën për vijimin e punimeve. Karakaçi bëri të ditur gjithashtu se është siguruar financimi edhe për 10 kilometrat e fundit, që do të mundësojnë lidhjen e aksit deri në zonën e Plepave, në Durrës. Sipas tij, Autoriteti Rrugor Shqiptar po përmbyll dokumentacionin e nevojshëm, me synimin për të hapur procedurën e konkurrimit brenda mesit të muajit nëntor.
“Po marrim të gjitha hapat e nevojshëm për të përmbyllur rrugën Kombinat- Plepa. Tashmë 5 kilometrëshi i parë që do të çojë deri në Pezë është i përfunduar dhe tashmë e ka marrë në dorëzim Autoriteti Rrugor Shqiptar. Lajmi i mirë është që ditën e djeshme autoriteti rrugor shqiptar ka finalizuar kontratën për vijimin e 9 kilometrave të pasues, ndërsa po ashtu, që është element i rëndësishëm për shkak të rëndësisë që ka ky segment rrugor, është edhe 10 kilometërshi që do të çojë deri në Durrës në Plepa, tashmë është i financuar. Autoriteti rrugor shqiptar po përmbyll gjithë dokumentacionin e nevojshëm që brenda mesit të muajit nëntor të hapi procedurën e konkurrimit. Pra, kemi një segment tashmë Kombinat – Plepa, i cili është i financuar. 9 kilometra vijues tashmë janë lidhur ditën e djeshme nga autoriteti rrugor shqiptar kontratat dhe 10 kilometra pasues që do të çojnë deri në Durrës janë të financuar dhe brenda mesit të muajit nëntor hapim procedurën konkurruese”, tha ministri Karakaçi
Me përfundimin e të gjithë segmentit, projekti Kombinat-Ndroq-Plepa synon të krijojë një lidhje më të mirë rrugore drejt Durrësit, duke përmirësuar infrastrukturën dhe aksesin për banorët dhe bizneset e zonës.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
