“Jemi me ju, mos na dëmtoni”, bizneset në Tiranë dhe Durrës apelojnë për kujdes

Bizneset në Tiranë dhe Durrës po përcjellin mesazhe për protestuesit, duke shprehur mbështetjen për kauzën e të rinjve, por duke kërkuar që tubimet të mos shoqërohen me dëmtime të pronave dhe aktiviteteve ekonomike.

“Ne jemi me ju, mos na dëmtoni biznesin”, shkruhet në një mesazh të vendosur në një dyqan ëmbëlsirash në Durrës, përmes të cilit pronarët u bëjnë thirrje protestuesve të tregohen të kujdesshëm.

Ndërsa protestat vijojnë në kryeqytet dhe qytete të tjera të vendit, përfshirë Durrësin, gjatë tubimeve janë raportuar dëmtime të infrastrukturës rrugore dhe të disa bizneseve pranë zonave ku janë zhvilluar përplasjet.

Në këtë situatë, apeli i sipërmarrjeve është që mbështetja për protestat të mos kthehet në dëme për bizneset, të cilat përbëjnë një pjesë të rëndësishme të aktivitetit ekonomik dhe punësimit.

Mesazhi i përcjellë nga biznesi në Durrës synon të ndajë mbështetjen për kauzën e të rinjve nga dëmtimi i pronës private, duke kërkuar që protestat të vijojnë pa pasoja për sipërmarrjet.