Shqipëria i mbylli negociatat për Kapitullin 20, cilat janë sfidat për 29 të tjerët?

Shqipëria ka marrë dritën jeshile nga Bashkimi Europian për mbylljen e negociatave për Kapitullin 20 të acquis-së, që lidhet me ndërmarrjet dhe politikën industriale. Me këtë zhvillim, numri i kapitujve për të cilët vendi ka përmbyllur negociatat shkon në katër.

Sipas Kryeministrit Edi Rama, mbyllja e negociatave për këtë kapitull krijon më shumë mundësi për investime, inovacion, rritje të konkurrueshmërisë dhe hapjen e vendeve të reja të punës.

Kapitulli 20 i bashkohet tre kapitujve të tjerë, mbyllja provizore e të cilëve u zyrtarizua në korrik, në përfundim të Konferencës së IX Ndërqeveritare Shqipëri-BE. Bëhet fjalë për Kapitullin 25 “Shkenca dhe Kërkimi”, Kapitullin 26 “Arsimi dhe Kultura” dhe Kapitullin 30 “Marrëdhëniet me Jashtë”.
Rruga drejt anëtarësimit mbetet e gjatë, por cilat janë sfidat që na presin? Shqipërisë i duhet të përmbyllë negociatat edhe për 29 kapitujt e tjerë, ndërsa objektivi i përcaktuar për përfundimin e procesit është viti 2027.

Kapitujt e mbyllur deri më tani lidhen me fusha ku volumi i legjislacionit që duhet përafruar është më i kufizuar. Në të kundërt, ndër fushat që kërkojnë më shumë punë për Shqipërinë janë drejtësia, bujqësia, siguria ushqimore dhe mjedisi. Sfidë mbetet edhe tregu i brendshëm, ku përafrimi dhe zbatimi i legjislacionit evropian kërkon angazhim të konsiderueshëm.

Një nga pjesët më të rëndësishme të procesit është grupkapitulli 1, “Themelorët”, që përfshin pesë kapituj dhe trajton çështje si gjyqësori, të drejtat themelore, statistikat, prokurimi publik, kontrolli financiar, drejtësia, liria dhe siguria. Ky grupkapitull konsiderohet ndër më sfiduesit, pasi lidhet drejtpërdrejt me funksionimin e institucioneve dhe zbatimin e standardeve evropiane.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern

Shqipëria pritet të vijojë reformat për përafrimin e legjislacionit me BE-në dhe forcimin e institucioneve, me synimin për të përmbushur kriteret e anëtarësimit dhe për të përmbyllur negociatat brenda afatit të vendosur për vitin 2027.