Rriten çmimet në prodhim, më e prekur industria përpunuese

Rriten lehtë çmimet në prodhim. Të dhënat e fundit të Institutit të Statistikave tregojnë se në tremujorin e dytë të këtij viti, Indeksi i Çmimeve të Prodhimit shënoi rritje me 0,1% kundrejt të njëjtës periudhë të një viti më parë. Rritja më e lartë vjetore u regjistrua në seksionet “Industri përpunuese” dhe “Furnizimi me ujë, aktivitete të trajtimit dhe menaxhimit të mbeturinave, mbetjeve” me 0,4 % secila.

Brenda seksionit “Industri përpunuese”, rritja më e madhe e çmimeve vërehet në aktivitetiet “Prodhimi i produkteve të kauçukut dhe plastikës” dhe “Përpunimi i produkteve ushqimore” me 1,5 % secila.

Ndërsa ulja më e madhe e çmimeve vërehet në aktivitetet “Metalurgjia” dhe “Prodhimi i paisjeve elektrike” me 0,7 %. Nga ana tjetër, seksioni “Energjia elektrike, gazi, avulli dhe ajri i kondicionuar” shënoi ulje me 0,6 %, pasuar nga seksioni “Industri Nxjerrëse” me 0,2 %. Për tregun vendas, IÇP u rrit me 0,3 %, krahasuar me të njëjtin tremujor të vitit 2025, ndërsa për eksportet shënoi ulje me 0,3 %.

Krahasuar me tremujorin e parë 2026, IÇP shënoi rritje me 0,1 %. Rritja më e lartë tremujore u regjistrua në seksionet “Industri nxjerrëse” me 0,2 %, “Industri përpunuese” dhe “Furnizimi me ujë, aktivitete të trajtimit dhe menaxhimit të mbeturinave, mbetjeve” me 0,1 % secila. Nga ana tjetër, seksioni “Energjia elektrike, gazi, avulli dhe ajri i kondicionuar” shënoi ulje me 0,1 %.