Shqiptarët ndryshojnë shije, kalojnë tek makinat elektrike

Makinat elektrike po preferohen gjithmonë e më shumë në Shqipëri, duke ndjekur trendin global. Të dhënat e fundit të Drejtorisë së Përgjithshme të Doganave tregojnë se në 8-mujorin e këtij viti, janë regjistruar mbi 7 mijë makina elektrike ose 2.5 herë më shumë se në të njëjtën periudhë të vitit të kaluar. Mjetet elektrike përbëjnë tashmë 10.6% të regjistrimeve të reja.
Një rritje të konsiderueshme ka shënuar numri i makinave elektrike kineze, të cilat kanë arritur në 7% të regjistrimeve, ndërsa Volksëagen dhe Mercedes-Benz vijojnë të kryesojnë.
Një tjetër tendencë që vihet re në importin e automjeteve, është një ngadalësim në nurmin e makinave që hyjnë për herë të parë në vendin tone.

Në gusht janë regjistruar rreth 8100 mjete, ose 10% më pak se në të njëjtën periudhë të një viti më parë.
Automjetet po importohen kryesisht nga Koreja e Jugut dhe Kina. Në 8 muaj, rreth 17 500 mjete kanë ardhur nga Koreja e Jugut, ndërsa nga Kina janë regjistruar mbi 10 600. Ndërkohë, Gjermania dhe Italia, që dikur dominonin tregun shqiptar, renditen pas tyre, me përkatësisht 7900 dhe 7700 mjete.