LIGJET E BIZNESIT
Bizneset janë optimistë për gjendjen e ekonomisë dhe pritshmëritë për të ardhmen. Banka e Shqipërisë publikoi Treguesin e Ndjesisë Ekonomike, ku vlerësoi një rritje të besimit me 1.8 pikë në muajin gusht. Sipas BSH-së, ky tregues ka qëndruar 7.4 pikë mbi mesataren e tij historike. Rritja e këtij muaji u mbështet kryesisht nga përmirësimi i besimit në sektorët e ndërtimit, të tregtisë dhe të shërbimeve. Në një masë më të vogël, por gjithsesi pozitivisht, ndikoi edhe rritja e besimit konsumator.
Treguesi i besimit të industrisë (TBI) u ul me 1.2 pikë përqindje në muajin gusht, krahasuar me një muaj më parë. Megjithatë, niveli i tij vijon të jetë 6.4 pikë përqindje mbi mesataren historike. Në rënien mujore ndikoi kryesisht vlerësimi më i dobët i bizneseve për kontratat porositëse, ndërkohë që vlerësimi për prodhimin aktual mbeti në të njëjtin nivel me muajin korrik. Pritjet e bizneseve për çmimet në të ardhmen regjistruan rritje.
Treguesi i besimit në ndërtim (TBN) u rrit me 4.7 pikë përqindje në muajin gusht, duke qëndruar rreth 10.3 pikë përqindje mbi mesataren historike. Rritja mujore e TBN-së u përcaktua nga përmirësimi i dy komponentëve të tij: vlerësimit të aktivitetit aktual ndërtues dhe kontratave porositëse. Pritjet për çmimet në të ardhmen vijuan prirjen rënëse edhe gjatë këtij muaji.
Treguesi i besimit në shërbime (TBSH) u rrit me 1.8 pikë përqindje në muajin gusht, duke qëndruar rreth 7 pikë përqindje mbi mesataren historike. Ecuria pozitive e TBSH-së u mbështet nga vlerësimi më i lartë i bizneseve për nivelin e kërkesës dhe për ecurinë aktuale të aktivitetit të tyre. Ndërkohë, pritjet e bizneseve për çmimet në të ardhmen shënuan rënie.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Treguesi i besimit në tregti (TBT) u rrit me 2.1 pikë përqindje në muajin gusht, duke qëndruar rreth 11 pikë përqindje mbi mesataren historike. Rritja e TBT-së u mbështet si nga vlerësimet më optimiste të bizneseve për ecurinë aktuale të shitjeve, ashtu edhe nga pritjet për rritjen e punësimit. Pritjet për çmimet në të ardhmen regjistruan rënie (Tabelë 2, sektori i tregtisë).
Treguesi i besimit konsumator (TBK) u rrit me 0.8 pikë përqindje në gusht. Niveli i tij qëndron aktualisht 2.2 pikë përqindje mbi mesataren historike dhe ka rikuperuar plotësisht rënien e regjistruar gjatë dy tremujorëve të parë të vitit. Në përmirësimin e TBK-së ndikuan kryesisht vlerësimet më pozitive të konsumatorëve si për blerjet e mëdha aktuale, ashtu edhe për ato të pritshme. Nga ana tjetër, pritjet e tyre për gjendjen financiare personale dhe për situatën ekonomike në të ardhmen nuk shënuan ndryshime të qenësishme krahasuar me muajin e kaluar.
