Blejmë dhe shesim, si ka ndryshuar gjeografia e shkëmbimeve tregtare të Shqipërisë

Shqipëria ka rritur shkëmbimet tregtare më fqinjët, gjë që ka rikonfiguruar edhe gjeografinë e partnerëve tregtarë. Të dhënat e fundit të Institutit të Statistikave tregojnë se në 7- mujorin e këtij viti, tregtia mbetet e orientuar në pjesën më të madhe nga vendet e Bashkimit Europian, ndërsa është rritur me Kinën, në drejtim të importeve. Kjo nisur edhe nga cmimet më të lira që sigurohen për mallrat dhe produktet nga ky vend.

Më saktësisht, shkëmbimet tregtare me vendet e BE-së zënë 53.6 %, të gjithë tregtisë. Në korrik 2026, eksportet drejt vendeve të Bashkimit Europian zënë 68.4 % të eksporteve gjithsej dhe importet nga vendet e BE-së zënë 47.8 % të importeve gjithsej.

Në muajin korrik të këtij viti, vendet me të cilat Shqipëria ka pasur rritjen më të madhe të eksporteve, në krahasim me Korrik 2025 janë: Greqia (19 %), Gjermania (2.5 %), etj. Ndërsa vendet me të cilat eksportet kanë pasur rënien më të madhe, janë: Italia (2 %), Kosova (2.4 %), etj. Në korrik, vendet me të cilat Shqipëria ka pasur rritjen më të madhe të importeve, në krahasim me të njëjtëb periudhë të një viti më parë janë: Italia (0.3 %), Kina (22.7 %), etj. Ndërsa vendet me të cilat importet kanë pasur rënien më të madhe, janë: Greqia (2.9 %), Gjermania (9.2 %), etj.

Vlen të theksohet se ky vit ka qenë i mbarë për eksportet shqiptare. INSTAT-i bën të ditur se në korrik 2026 eksportet e mallrave arritën vlerën 33.7 miliardë lekë, duke u rritur me 10,6 %, në krahasim me të njëjtën periudhë të një viti më pare. Ndërsa si periudhë 7-mujore, eksportet arritën në rreth 227 miliardë lekë, me një rritje vjetore prej 6.7%.