LIGJET E BIZNESIT
Në pasuri të paluajtshme, vepra arti, automjete apo bizhuteri… duke përdorur shqiptarë e shtetas të huaj, kryesisht në Afrikën e Jugut, vitin e shkuar u identifikuan 7 skema të pastrimit të parave. Të dhënat nga Agjencia e Inteligjencës Financiare, të përmbledhura në raportin e vitit të shkuar, tregojnë se gjatë 2025-s u bllokuan e më pas u sekuestruan rreth 763 mijë euro. Vlera e parave që grupet kriminale u përpoqën të pastronin vjet, por që u kapën nga Inteligjenca Financiare, është 13-fish më e ulët se gjatë 2024-s.
“Të dhënat tregojnë se, pavarësisht se ne kemi dalë nga lista gri e pastrimit të parave, ky fenomen mbetet prezent dhe në formë shqetësuese.”
Ndër skemat që “Inteligjenca Financiare” ka zbuluar është një 18-vjeçare e cila bleu vilë 1.5 milion euro në bregdet, financuar nga motra 40-vjeçare që jetonte në Afrikën e Jugut dhe fitonte miliona nga lojërat online në Seychelles. Kjo e fundit bleu edhe vetë një vilë 1.7 milion euro dhe investoi 700 mijë euro në vepra arti, ndërsa fondet i justifikonte me bashkëshortin. Ky i fundit rezulton i përfshirë në aktivitete të paligjshme të lidhura me krimin e organizuar.
“Tre elementët kryesorë të pastrimit të parave janë vendosja (placement), shtresëzimi dhe integrimi. Të tre këto elementë nuk kanë ndryshuar.” “Përdoren kryesisht bizneset në fushën e shërbimeve. Ato janë më të vështirat për t’u gjurmuar.”
Të dhënat nga Agjencia e Inteligjencës Financiare për bankat, pikat e këmbimit valutor apo noterët vitin e shkuar tregojnë se pati 1 mijë e 759 raportime për pastrim parash. Në raport me vitet e mëhershme, “Raporti i aktivitetit të dyshimtë” pësoi rritje. Kryesisht në Policinë e Shtetit dhe Prokurorinë e Posaçme SPAK, “Inteligjenca Financiare” përcolli 269 raste të dyshuara të pastrimit të parave, 10 raste më tepër se në vitin 2024.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
“Në mendimin tim, ka shumë më shumë raste për t’u shqyrtuar dhe shumë më shumë vepra ende të paregjistruara. Këto janë vlera të parave të kapura, por fenomeni është shumë më i gjerë.”
Të dhënat nga Agjencia e Inteligjencës Financiare tregojnë se vitin e shkuar, me vendim të Prokurorisë apo Gjykatës, u sekuestrua 97 për qind e vlerës së parave të bllokuara. Ky raport ka mbetur thuajse i pandryshuar në 6 vitet e fundit./A2 CNN
