Rama ftesë qytetarëve për të pastruar malet

Nëpërmjet një postimi në facebook Kryeministri Edi Rama ka ftuar qytetatrët që në 26 gusht të bëhen pjesë e nismës “Male të Pastra”. Bëhet fjalë për një aksion pastrimi organizuar nga Agjencia Kombëtare e Zonave të Mbrojtura në dhjetë parqe kombëtare e natyrore.

“Aksioni do të zhvillohet si një kontribut modest i gjithësecilit e njëkohësisht mesazh kuptimplotë për kujdesin ndaj natyrës së përbashkët”, shkruan Rama.

Aksioni i pastrimit “Male të pastra” angazhoi vitin e kaluar qindra vullnetarë, të cilët larguan qindra kilogramë mbetje nga parqet kombëtare.

Këtë vit fushata do të shtrihet në Parqet Kombëtare të Dajtit, Tomorrit, Llogorasë, Qafështamës, Zagorisë, Prespës, Shebenik, Korab-Koritnik si dhe në Alpet Shqiptare.