LIGJET E BIZNESIT
Banka e Shqipërisë mban në pandryshuar në 2.5% normën bazë të interesit. Vendimi është marrë në mbledhjen e fundit të Këshillit Mbikëqyrës. Guvernatori Gent Sejko deklaroi se ekonomia po ecën me ritme pozitive në treguesit kryesorë të saj.
“Analiza e informacionit të disponuar sugjeron se ekonomia shqiptare, punësimi dhe pagat kanë vijuar të rriten, ndërsa parametrat kryesorë të stabilitetit makroekonomik, monetar e financiar të vendit janë përmirësuar më tej. Në veçanti, inflacioni ka vijuar të qëndrojë në nivele të ulëta, duke shënuar një rritje të lehtë drejt objektivit në tremujorin e dytë. Po ashtu, tregjet financiare kanë qenë përgjithësisht të qeta dhe kreditimi ka ardhur në rritje””, ka deklaruar Sejko.
Ai ka shtuar se se këto trende pozitive zhvillimi do të vijojnë edhe në të ardhmen. “Ndonëse pasiguritë në ambientin e huaj mbeten të larta, ekonomia shqiptare pritet të vijojë të rritet me ritme pranë potencialit, ndërsa inflacioni pritet të kthehet në objektiv në gjysmën e parë të vitit të ardhshëm”, ka deklaruar guvernatori.
Banka e Shqëipërisë vlerëson se panorama e rreziqeve për të ardhmen mbetet komplekse. “Në veçanti, rritja e barrierave tregtare në tregjet e huaja dhe rritja e tensioneve gjeopolitike mbeten faktorë të rëndësishëm pasigurie në parashikimet ekonomike. Materializimi i skenarëve më negativë të rrezikut do të kishte pasoja potenciale negative në ecurinë ekonomike dhe nivelin e çmimeve në vend”, ka thënë kreu i Bankës Qendrore.
Përvec analizimit të gjendjes së ekonomisë, Këshilli Mbikëqyrës i Bankës së Shqipërisë vendosi të japë miratimin paraprak për licencimin e degës së bankës së huaj “Dega e Bankës Turkiye Cumhuriyeti Ziraat Bankasi A.S., Albania” për të ushtruar veprimtari bankare dhe financiare në Republikën e Shqipërisë.
