LIGJET E BIZNESIT
Të marrësh një kredi për të blerë banesë pritet të bëhet më e vështirë. Banka e Shqipërisë ka konstatuar në raportin e fundit mbi Aktivitetin Kreditues se kërkesa nga ana e qytetarëve do të pësojë rënie, ndërkohë që edhe reagimi i sistemit bankar do të jetë me shtrëngim të kushteve. Krejt e kundërta do të ndodhë me bizneset, kushtet e kreditimit të së cilëve do të lehtësohem për të gjitha llojet e kredive.
“Përqasja e bankave në kreditimin e bizneseve pritet të mbetet e njëjtë edhe në tremujorin e tretë të vitit, për të gjitha kategoritë e biznesit si edhe në të gjitha kreditë lëvruar sipas qëllimit të përdorimit.
Në të kundërt, politikat e kreditimit priten të jenë shtrënguese për individët, kryesisht në segmentin e kredive për blerjen e banesave. Kërkesa për kredi e bizneseve pritet të mbetet e lartë për çdo lloj qëllimi të përdorimit. Në të kundërt, kërkesa për kredi e individëve pritet të bjerë në tremujorin e tretë, kryesisht në ato për blerje banesash”, thekson raporti.
Prësa i përket tremujorit të dytë të këtij viti, Banka e Shqipërisë konstaton se bankat ndoqën politika të ngjashme kreditimi për bizneset në krahasim me një tremujor më parë. Ato ruajtën standarde, kushte e terma kreditimi të njëjta, si edhe miratuan një raport të ngjashëm kredish me një tremujor më parë, në segmentin e bizneseve.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
“Bankat vijojnë të jenë prudente në vlerësimin e rrezikut, duke aplikuar marzhe më të larta në kreditë e kategorizuara me rrezik. Kuadri kreditues për individët, ngjashëm me bizneset, u raportua pothuajse i pandryshuar në tremujorin e dytë të vitit. Bankat mbajtën të pandryshuar standardet, kushtet dhe termat e kreditimit për kreditë akorduar individëve në tremujorin e dytë”, theksohet në raport.
Nga ana tjetër, ato raportuan një shkallë më e lartë miratimi kredish për individët, në sajë të vlerësimeve të bankave për cilësinë e kredimarrësve dhe të historikut të individëve në tregun e punës. Në linjë me pritjet e një tremujori më parë, kërkesa për kredi e sektorit privat u raportua më e lartë. “Nevojat e shtuara për financim – në mbulimin e investimeve të planifikuara nga bizneset, si edhe në blerjen e banesave apo financimin e konsumit nga individët, – treguesi i besimit të biznesit dhe të konsumatorit, si edhe ambienti i favorshëm i normave të interesit nxitën kërkesën e shtuar për kredi të agjentëve ekonomikë në tremujorin e dytë të viti”, vlerëson BSH.
