U zunë me grushta në aeroport, Balla fiton gjyqin ndaj dhëndrit të Berishës

Kreu i grupit parlamentar të Partisë Socialiste Taulant Balla ka fituar sot gjyqin me dhëndrin e ish-kryeministrit Sali Berisha, Jamarbër Malltezi.

Këtë lajm e ka bërë të ditur vetë Balla në një postim në rrjetet sociale, teksa shprehet se sipas tij Malltezi është vetëdorëzuar në Gjykatën Italiane dhe ka pranuar fajin.

Gjithashtu Balla ka publikuar çekun e dëmshpërblimit të gjyqit, ndërkohë që deklaron se 3000 eurot do t’i investojë për një institucion para-shkollor për fëmijët e komunitetit rom në Librazhd..

STATUSI I PLOTE I TAULANT BALLES

“Fondi për Edukimin, përmes të cilit do investojmë në kopshte dhe çerdhe, me të ardhurat që burojnë nga gjyqet me berishët, lulëzimat dhe artistat e PD u shtua sot me një “kontribut” të vlefshëm nga dhëndri i Sali Berishës prej 3000 Euro. Berishët u vetë-dorëzuan para Gjykatës italiane, duke vetë-pranuar fajin dhe turpin e vet në një betejë juridike, ku isha i bindur për fitoren.

Siç kam dhënë fjalën, e gjithë kjo shumë do të shkojë për një institucion para-shkollor në Librazhd. Në ditët në vijim ky çek do t’i kalojë fëmijëve të komunitetit të nderuar rom në Librazhd. Vazhdoni të bëheni për turp në sytë e njerëzve, sepse ne kemi gjetur tashmë instrumentin si ta bëjmë të dobishëm Lulin, Saliun dhe artistat e PD

Shpifjet, që më pas frymëzojnë dhunën dhe molotovët, janë fundi i asaj çfarë ka mbetur nga PD.”

Kujtojmë se më 25 qershor të vitit 2016, Balla dhe Malltezi u konfliktuan në aeroportin e Romës ndërsa pas sherrit Balla e kallëzoi atë në polici.

Ai deklaroi se është qëlluar fizikisht nga dhëndri i Berishës.

“Malltezi ka ushtruar dhunë fizike ndaj meje. Ngjarja ndodhi teksa po prisja avionin në aeroportin ‘Da Vinci’ në Romë. Aty jam qëlluar me grushta e shkelma nga Malltezi”, deklaroi Balla asokohe.