LIGJET E BIZNESIT
Nuk mjaftoi mishi i pulës me salmonelë, konsumatorët shqiptarë po përballen edhe me luleshtrydhe me pesticide. Lajmi është dhënë nga Autoriteti Kombëtar i Ushqimit. AkU njofton se një ngarkesë luleshtrydhe me pesticide ka hyrë në vend më 17 shkurt dhe 52 kg të këtij fruti janë shitur në markete e tregje të vendit.
Ky institucion bën të ditur se shqetësimi për këto ngarkesa me luleshtrydhe, të cilat kanë rezultuar të kontaminuara me pesticide është përcjellë nga RASFF, sistemi i alarmit të shpejtë për ushqimin i Komisionit Europian.
Menjëherë pas konstatimit të ngarkesës prej 52 kg që hyri në tregun tonë, AKU thotë se e dërgoi mostra për analizim laboratorik, por e gjithë sasia rezulton e shitur.
Më tej AKU sqaron se u ka kërkuar të gjitha Pikave Kufitare që të marrin mostra nga 10 ngarkesa dhe kërkon bllokimin në kufi të çdo ngarkese me luleshtrydhe nga Greqia, deri në daljen e përgjigjes së analizave.
NJOFTIMI I AKU:
Në kuadër të transparencës dhe informimit të publikut, Autoriteti Kombëtar i Ushqimit, bën me dije se për çdo rast të konstatuar (në treg apo në Pikat e Inspektimit Kufitar), të rezultuar jo-konform kërkesave dhe standardeve me legjislacionin në fuqi për produkte të importit, njoftohet Sistemi i Njoftimit të Shpejtë për Ushqimin dhe Ushqimin për Kafshë – RASFF. Lidhur me rastin e produktit Luleshtrydhe të një sasie prej 52 kg, të importuar nga Shteti i Greqisë, AKU në bazë të Planit të Monitorimit me Bazë Risku zbatoi procedurën e dërgimit në datën 17 shkurt 2025 për analizim laboratorik dhe pas daljes së rezultatit u angazhua nëpërmjet sistemit të gjurmueshmërisë për mbledhjen dhe tërheqjen nga tregu të kësaj sasie luleshtydhe. Në bazë të faturave të shitjes të paraqitura nga Operatori i Biznesit Ushqimor e gjithë sasia rezultonte e shitur.
Menjëherë pas këtij rasti, Autoriteti Kombëtar i Ushqimit ka bërë vlerësim të riskut për këtë produkt dhe e ka kategorizuar me risk të lartë. Për këtë, është komunikuar me të gjitha Pikat e Inspektimit Kufitar, për mostrimin e 10 ngarkesave të njëpasnjëshme dhe bllokimin në kufi të çdo ngarkese me luleshtrydhe, deri në daljen e përgjigjes së analizave të çdo mostrimi për produktin që mund të vijojë të importohet nga Greqia.
Synimi i urdhërimit për bllokime të tilla në PIK është që të pritet çdo rezultat analize e mostrimeve në të tilla raste. Në bazë të këtyre rezultateve do të përcaktohet nëse importet do të lejohen për tregtim brenda territorit shqiptar apo do të kthehen në vendin e origjinës. Lidhur me prononcimin në media të tre rasteve për njoftimin e AKU-së nga sistemi RASFF, ju bëjmë të ditur se ka qenë AKU që ka njoftuar sistemin RASFF si pasojë e zbatimit me korrektësi të planeve të monitorimit dhe marrjes së mostrave, si në tregun e brendshëm ashtu edhe në kufi (PIK).
