Jo më det dhe rërë, turistët po vijnë në Shqipëri dhe në dimër

Nga Aurora Sulce, Producente Ekzekutive për Biznesin në A2 CNN

Në Shqipëri, turistët nuk po vijnë më vetëm për detin dhe rërën. Kjo pasi turistë ka edhe në dimër, duke sinjalizuar se sezoni turistik po shkon me shtrirje gjithëvjetore.

Të dhënat tregojnë se në janar, në vendin tonë numri i turistëve të huaj i kapërceu 560 mijë, duke shënuar një rritje prej 14.5% kundrejt të njëjtës periudhë të një viti më parë.

Por teksa të huajt vijnë në Shqipëri, shqiptarët ikin jashtë.

Muajin e kaluar mbi 700 mijë shqiptarë dolën nga vendi, ose 11.3% më shumë se në janar të 2024-ës.

Kjo lëvizje ndjekin dinamikën e turizmit, një sektor që të paktën në dy vitet e fundit ka marrë një hov të madh zhvillimi, duke u shndërruar në lokomotivën që po tërheq rritjen ekonomike të vendit. Kjo edhe pse problemet mbeten të shumta, një pjesë të reja e të tjera, të mbartura në vite.

Më shqetësueset janë: mungesa e fuqisë punëtore; zhvlerësimi i euros; niveli i lartë i informalitetit; niveli i ulët i shërbimeve dhe mungesa e koordinimit të politikave publike me ato private.