Thellohet “gropa” e eksporteve, rënie 13.9% deri në nëntor

Zhvlerësimi i euros dhe konjukturat aspak të favorshme ndërkombëtare kanë thelluar pikiatën, në të cilën kanë hyrë tashmë eksportet shqiptare. Të dhënat e fundit të Institutit të Statistikave tregojnë se për 11 muajt e këtij viti, eksportet e mallrave arritën vlerën 347 miliardë lekë, duke u ulur me -13.9 % krahasuar me një vit më parë. Ndërkohë importet e mallrave arritën vlerën 816 miliardë lekë, duke u rritur me 2.0 %, krahasuar me një vit më parë. Deficiti tregtar arriti vlerën 469 mld lekë, duke u rritur me 18,0 %, krahasuar me të njëjtën periudhë të 2023.

Kontributi i grupeve kryesore në eksporte

Instituti i Statistikave raporton se gjatë muajit nëntor, në uljen e eksporteve prej -8,5 %, kanë ndikuar grupet: “Materiale ndërtimi dhe metale” me -8,8 pikë përqindje, “Tekstile dhe këpucë” me -3,4 pikë përqindje, “Produkte kimike dhe plastike” me -1,7 pikë përqindje etj.

Ndërsa pozitivisht kanë ndikuar grupet: “ Ushqime, pije, duhan” me 2,5 pikë përqindje, “Makineri, pajisje dhe pjesë këmbimi” me 1,4 pikë përqindje, “Minerale, lëndë djegëse, energji elektrike” me 0,4 pikë përqindje.

Tashmë prej dy vitesh eksportuesit shqiptarë dhe kryesisht fasonistët kanë dhënë alarmin për gjendjen e vështirë në të cilën ndodhen dhe kanë kërkuar nga qeveria marrjen e masave. Në të kundërt, pritet që industria të shkurtojë fuqinë punëtore, ashtu sic ndodhi edhe në fillim të 2024-ës.