LIGJET E BIZNESIT
Që nga faqet e rrjeteve sociale, paketave televizive apo website AI, e deri tek mjete fizike si ora, telefona dhe makina, shqiptarët përdorin rrjetin social Telegram si urë lidhëse për të kryer transaksione jashtë syrit të shtetit.
Kjo dukuri, e cila kryesisht përfshin të rinjtë, ka krijuar një hapësirë të re për shkëmbimet e shërbimeve dhe produkteve fizike, duke u ofruar atyre një liri financiare që duket se po bëhet gjithnjë më e rëndësishme.
Të rinjtë, të pasionuar pas mundësive të reja, formojnë grupe në Telegram për të ndarë oferta dhe për të tregtuar produkte. Pjesa më e madhe e atyre që duan të shesin online fillojnë me krijimin e faqeve me shumë ndjekës, për të krijuar një imazh besueshmërie te konsumatorët. Çmimet për produktet variojnë nga 2,000 deri në 70,000 lekë, duke u përshtatur me numrin e ndjekësve dhe reputacionin e faqes.
Një tjetër fenomen që ka marrë përhapje është shitja e paketave televizive “pirate”. Këto grupe ofrojnë paketa njëvjeçare për rreth 30 euro e deri në 70 euro, një çmim shumë tërheqës për ata që duan të shijojnë përmbajtje të ndryshme pa shpenzuar shumë, por duhet patur kujdes edhe nga ato që janë skema piramidale. Sipas të dhënave të institutit të statistikave, rreth 25% e bizneseve në Shqipëri kanë kryer shitje online në vitin aktual.
Kjo tregon një tendencë në rritje për të shfrytëzuar mundësitë e tregtisë digjitale, ndërsa shitjet fizike po shkojnë në rënie. Megjithatë, është e rëndësishme të theksohet se këto të dhëna nuk përfshijnë transaksionet informale, të cilat po zhvillohen jashtë rregullave të shtetit.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Kjo situatë krijon një realitet të ri tregtar në Shqipëri, ku liria financiare dhe qasja në mundësi të shumta janë tërheqëse për shumë individë. Megjithatë, nëse vazhdon të rritet informaliteti, sfidat për autoritetet dhe për të gjithë tregun do të jenë të mëdha./TV Scan
