Sektori privat ka ndjekur shtetin në rritjen e pagave. Të dhënat e Institutit të Statistikave tregojnë se në tremujorin e dutë të këtij viti, paga mesatare mujore bruto për një të punësuar arriti në 75.114 lekë, duke u rritur me 5,9 %, krahasuar me të njëjtën periudhë të një viti më parë.
Por edhe me rritjen më të madhe të bërë këtë vit, pagat në shtet rezultojnë më të larta se ato në privat. Kështu, të dhënat tregojnë se paga mesatare bruto në administratën publike vlerësohet në 85.901, ndërsa në bizneset private 70.430 lekë.
Gjatë tremujorit të dytë 2024, aktivitetet ekonomike që ofrojnë pagë mesatare mujore bruto, më të lartë se paga mesatare në nivel kombëtar, janë “Aktivitetet Financiare dhe të Sigurimit dhe Informacioni dhe Komunikacioni”. Krahasuar me të njëjtin tremujor të vitit të kaluar, gjatë tremujorit të dytë 2024 paga mesatare bruto për grupaktivitetin e “Aktivitetet financiare dhe të sigurimit” ka rritjen më të madhe prej 11,4 %, ndërsa rritjen më të vogël e ka grup-aktiviteti “Administrata publike dhe mbrojtja”; “Sigurimi social i detyrueshëm”; “Arsimi”; “Shëndetësia dhe aktivitete të punës sociale” prej 3 %.
Gjatë tremujorit të dytë 2024, grup-profesionet e “Manaxherëve, Ligjvënësve, Nëpunësve të lartë të administratës shtetërore dhe drejtorëve ekzekutivë” dhe “Specialistë me arsim të lartë (profesionistë)”, ofrojnë pagat mesatare mujore bruto më të larta, krahasuar me pagën mesatare në nivel kombëtar.
