Thirrja e Ramës për emigrantët, a do të investojë diaspora në Shqipëri?

Në turin me diasporën në Greqi dhe Itali, kryeministri Rama kërkoi nga emigrantët shqiptarë të investojnë në Shqipëri, kapitalin dhe dijet e tyre. Një burim që do të ishte i konsiderueshëm për ekonominë shqiptare, duke pasur parasysh se ne jemi vendi i tretë në botë për diasporën më të madhe. Kryesisht në Itali, Greqi, Gjermani, Mbretëri e Bashkuar, Shtetet e Bashkuara të Amerikës, Kanada e të tjerë, jetojnë e punojnë 1,7 milionë qytetarë.

Një kthim i mundshëm i një pjese prej tyre, do të balanconte emigrimin që po vijon intensivisht vitet e fundit, do të ndihmonte ekonominë me burime financiare dhe ekspertizën më të mirë, duke rritur konkurrueshmërinë dhe produktivitetin e saj.

Deri më tani, kontributi i diasporës ka qenë kryesisht në drejtim të dërgimit të dërgesave në atdhe, ato që ndryshe njihen si remitancat, që vitin e kaluar arritën rekordin e 930 milionë eurove.

Ndërkohë që pjesa më e madhe e investimeve nga diaspora, veçanërisht në pesë vitet e fundit, kanë shkuar në projekte në sektorë si agroturizmi, turizmi, bujqësia dhe shërbimet financiare.